Zaborren zerga %50 igotzea erabaki du Udalak
Progresibitatearen printzipioa aplikatuko da lehen aldiz: zenbat eta diru gutxiago izan, orduan eta deskontu handiagoa
2007ko ohiko azken udal plenoa egin zen atzo iluntzean. 2008rako zerga arauak onartu gabe gelditu ziren urriko plenoan, zaborraren eta uraren gaineko zergen inguruan adostasun maila handiagoa lortu nahi zuelako Udal Gobernuak. Azkenean, atzo onartu ziren 2008rako zerga arauak, ANV, EA eta EB-Aralarren babesarekin..
Baleike
Horrela, 2008an zaborraren zerga %50 igotzea erabaki da. Zaborren kudeaketaren kostoa, berriz, %126 inguru igoko dela aurreikusi dute arduradunek, Gipuzkoako zabortegiekin dauden arazoak medio. %50eko igoera horrek, baina, ez du eragin berbera izango herritar guztiengan. EB-Aralarrek aurkeztutako proposamenari jarraituta, "progresibitatearen printzipioa" aplikatuko da lehen aldiz Udalean. Hau da, gutxiago duenak gutxiago ordainduko du, gehiago duenak gehiago. Familia bakoitzak zenbat ordaindu beharko duen jakiteko taula batzuk osatu dira.
Erabaki horren aurrean, EAJ eta PSE aurka agertu ziren. Bien ustez, "makillaje hutsa" da progresibitatearena, "%50eko igoera estaltzeko bide korapilotsua". Gainera, taula ez dagoela ondo egina salatu zuen EAJk, ematen diren hobarien progresibitatea ez dela batere justua. Horrez gain, taula hori zuzentasunez aplikatzeko arazoak ikusten zituzten, "Udalari oso zaila zaiolako familia bakoitzaren benetako diru iturriak zein diren jakitea".
PSEren iritziz, kostoaren pareko igoera beharko luke zergak ere, hau da, %126.
EB-Aralarrek, bere aldetik, ontzat eman zuen ideia, baina zalantzan jarri zuen taula ondo ote dagoen. Hurrengo urterako, Zumaiako familien egoera sozio-ekonomikoa aztertzea eskatu zuen, taula emaitza horiek oinarri egin dadin.
Ogasun Batzordeko buru Joseba Azpiazuk azaldu zuenez, "esperientzia pilotoa" da eta ez dakite nolako eragina izango duen. Familia bakoitzak zenbateko hobaria izango duen jakiteko agiriak eskatuko zaizkiela zehaztu zuen, eta ez dela ezer estaltzeko makillajea. "Azarotik dago batzordean planteatuta. Azkoitian PSEk bonifikazioak aplikatu ditu eta hango zinegotzia oso harro dago lehena izan delako".
Haurtzaindegia
2007ko aurrekontuen txostenean haurtzaindegia Amaiako Plazan egingo dela jartzen duela eta -aurreko Udal Gobernuak hala erabaki zuen-, "segurtasun juridikoagatik" hori zuzendu eta Arrangoletako plazan egingo dela jartzea eskatu zuen Iñaki Arrizabalaga alkateak. Ondoren, Arrangoletako proiektua aurrekoa baino hobea eta merkeagoa dela defenditu zuen. "EAJk Bidasoa kalean egin nahi zuenak 200.000 euroko kostoa zuen, gehi kale hori urbanizatzeko gastatuko zena. Beraz, dezente gehiago. Gure proiektuak 148.000 euroko kostoa du". EAJk erantzun zion Bidasoako kalekoa proiektu hobeagoa zela, teknikoen oniritzia zuela, eta kaleak asko irabaziko lukeela peatonalizatu ondoren.
PSEk berriz, erabaki politiko bat ikusten du proiektu aldaketaren atzean. "Bidasoa kaleko lokalak talde batzuri eman ahal izateko egin da proiektu aldaketa, eta horrekin ez gaude batere ados".
EB-Aralarren iritziz Arrangoletako aukera hobea da, bestean haurrek ez zutelako jolasteko lekurik. Gainera, azpimarratu zuten "behin-behineko" soluzioa dela, haurtzaindegi berria egin bitartekoa.
Alkatearen eskaera aurrera atera zen, EA, ANV eta EB-Aralarren aldeko botoekin.
Hirigintzako Aholkularitza Kontseilua
Jaurlaritzaren Lursoruaren legeak hala eskatuta, udal plangintzarako aholku batzorde bat osatuko du Udalak, herritarren partaidetza bultzatzeko. Alkateak, zenbait zinegotzik eta herriko hainbat elkartetako ordezkarik osatuko dute aholku batzorde hori. Herriko planeamendu urbanistikoari jarraipena egin, ideiak proposatu eta informazioa herritarrei helaraztea izango dira batzorde horren zereginetako batzuk. Horrela osatuko da: alkatea izango du presidente, Ingurugiro Batzordeko burua bokal, Udal Gobernutik kanpo dauden alderdiek ordezkari bana izango dute. Horiez gain, herriko elkarteetako ordezkariak: auzotarrak, ekologistak, hezkuntza mundukoak, merkatariak, enpresariak, baserritarrak, sindikatuak, ezindu fisikoak, emakumeak, nukleo historikoak (Oikia, Artadi, Narrondo eta Estazioa), gazteak, eta kirol eta kultur elkarteak.
Irakurri
